Դեկտեմբերի 3-ին Կարեն Դեմիրճյանի անվան մարզահամերգային համալիրի մեծ դահլիճում կկայանա «Մանկական Եվրատեսիլ 2011» համաեվրոպական երգի մրցույթը:
Երեւանում արդեն ընթանում են նախապատրաստական աշխատանքները. ընտրվել են մրցույթի պաշտոնական նշանաբանը` «Reach For The Top» կամ «Հասի՛ր բարձունքին», եւ տարբերանշանը, որը մշակվել է Հանրային հեռուստաընկերության ստեղծագործական թիմի, Անտոն Բառանովի եւ Եվրոպական հեռարձակողների միության համատեղ աշխատանքի արդյունքում:
Մրցույթի հաղորդավարների ընտրության քննարկումներում նշվում է նաեւ Գարիկ Մարտիրոսյանի անունը: «Մի քանի տարբերակ ունենք, կարող եմ միայն մեկի` Գարիկ Մարտիրոսյանի անունը նշել»,- հուլիսի 21-ին լրագրողների հետ հանդիպման ժամանակ ասաց «Մանկական Եվրատեսիլ 2011»-ի եւ Հանրային հեռուստաընկերության երաժշտական պրոդյուսեր Գրիգոր Նազարյանը:
Հանդիպմանը ներկա էին նաեւ «Մանկական Եվրատեսիլ 2011»-ի գործադիր պրոդյուսեր Լեւոն Սիմոնյանն ու մրցույթի հայաստանյան պատվիրակության ղեկավար Գոհար Գասպարյանը, ովքեր նշեցին, որ աշխատանքներն ընթացքի մեջ են եւ շատ հարցեր իրենց հստակ պատասխանները դեռեւս չեն կարող ստանալ, ինչպես օրինակ` ով է ներկայացնելու Հայաստանը, քանի երկիր է մասնակցելու մրցույթին, որքան կարժենան տոմսերն ու ինչքան է կազմում միջոցառման բյուջեն:
«Դեռ չեմ կարող հստակ թիվ ասել, քանի որ չգիտենք` քանի երկիր կներկայացնի մասնակցության հայտ: Ըստ դրա կորոշվեն նաեւ ծախսերը: Տոմսերն էլ մատչելի ու բոլորին հասանելի են լինելու”,- նշեց Գրիգոր Նազարյանը:
Խոսվեց նաեւ Հայաստանի ներկայացուցչի հայտերի ընդունման ժամկետից, որը լրացել է հուլիսի 20-ին: «Արդեն մոտ 50 հայտ ունենք, բայց ընդունող հանձնաժողովը կաշխատի մինչեւ օգոստոսի 20-ը, քանի որ հիմա ամառ է, եւ շատ երեխաներ քաղաքում չեն գտնվում»,-ասաց Գոհար Գասպարյանը:
«Երգը պետք է հասանելի լինի եվրոպացիների ականջին: Դրա մեջ պետք է լինի մեր ազգային ոճը, իսկ լեզուն, չգրված օրենքի համաձայն, պետք է լինի հայերեն եւ անգլերեն: Սա լսելու է ողջ աշխարհը. պետք է այլազգիներին եւս հասկանալի լինի»,-BRAVO.am-ին ասաց Գրիգոր Նազարյանը:
Ոճային առումով մրցույթի երաժշտական պրոդյուսերը որեւէ սահմանափակում չի ուզում դնել. «Ամեն ոճի մեջ մենք կարող են ստեղծել լավը, այնպես անել, որ երգը սիրվի»: Արդեն ստացված մոտ 50 հայտի մեջ կան տարբեր ոճի ու ժանրի երգեր, բայց պրոդյուսերը առաջին հերթին կարեւորում է մասնակցին, նրա ակտիվությունն ու պահվածքը` որպես մեր ազգի ներկայացուցիչ. «Երգն արդեն ժամանակի հարց է, կարող ենք վրան որոշակի աշխատանք եւ ուղղումներ անել: Պետք է ամեն ինչ անենք, որ Հայաստանը պատվով ներկայանա այս մրցույթին:)»:
«Մանկական Եվրատեսիլ 2011»-ին մասնակցության հայտ Հայաստանը Թուրքիայից եւ Ադրբեջանից դեռեւս չի ստացել: Ինչպես նշում են հանդիպմանը ներկա բանախոսները, հայտեր առայժմ ստացել են 12 երկրից, իսկ մասնակից երկրների առավելագույն թիվը 18-ն է:
Հայաստանում կայանալիք համաեվրոպական մանկական երգի մրցույթի մասնակցությունից, ինչպես նշում է Գոհար Գասպարյանը, մի շարք երկրներ հրաժարվել են ֆինանսական խնդիրների պատճառով. «Սերբիան, Բոսնիա եւ Հերցոգովինան, Կիպրոսը, Հունաստանը եւ այլ երկրներ շատ են ուզում գալ, բայց ֆինանսական խնդիրների պատճառով չեն մասնակցելու»: Գերմանիան եւս չի մասնակցելու. պատճառը մրցույթի հեռարձակման ժամի հետ կապված խնդիրներն
են, քանի որ տվյալ ժամին ունեն ֆիքսված հաղորդումներ, որոնք հետաձգել չեն կարող:
 |
