 Հայաստանի լավագույն ռոք-բենդերից մեկը` "Դորիանսը”, որը շուտով կնշի գործունեության երեք տարին, բծախնդրորեն աշխատում է իր` դեռեւս առաջին, անչափ սպասված ձայնասկավառակի վրա: CD-ն վաղուց արդեն կարող էր պատրաստ լինել. կան երգեր, ձայնագրություններ, բայց տղաները առաջնորդվում են "եթե չես կարող մի բան լավ անել, ընդհանրապես մի արա” կարգախոսով:
 Գոռ մաքսիմալիստ է, երաժշտության մեջ շատ պահանջկոտ, իսկ առօրյա հարցերում` պատասխանատու
"Ֆորդ” ավտոմեքենաների ընկերության հիմնադիր Հենրի Ֆորդը ասում էր` ամեն ինչ կարելի է արածից էլ ավելի լավ անել: "Դորիանսի” դեպքում հենց այդպես է :): Տղաները նախընտրում են հազար անգամ ձայնագրել-ջնջել, փոխել երաժշտական գործիքների հնչողությունը` ոչ թե կատարելության, այլ ոսկե միջինին հասնելու համար: Չափանիշն ընտրված է` ապահովել մաքսիմալ որակ:
Հիմա տղաները շարունակում են ձայնագրման բուռն աշխատանքները, վերջին հղկումներն են անում երգերում: Երաժշտական գործիքների կենդանի հնչողություն, հեղինակային երգեր, հայտնի ու պրոֆեսիոնալ երաժիշտների մասնակցություն` ի դեմս թավջութակահար Արտյոմ Մանուկյանի, Նորայր Քարդաշյանի, ով պկու (եղեգից պատրաստված շվի) է նվագում, ու, օրինակ, հենց այդ գործիքի շնորհիվ "Brave” երգը նոր, թարմ, էթնիկ գույն է ձեռք բերել:):
 "Դորիանս” խմբի պրոդյուսեր Վահագնը
"Դորիանս” խմբի վոկալիստ Գոռ Սուջյանը մաքսիմալիստ է, երաժշտության մեջ շատ պահանջկոտ, իսկ առօրյա հարցերում` պատասխանատու: "Ձայնագրված գործերը սաունդային առումով փորձում եմ համեմատել, օրինակ, նույն լեգենդար "Pink Floyd”-ի գործերի հետ ու հենց դրա համար ա, որ միշտ ավելիին ենք ձգտում”,- պատմում է Գոռը:
Ձմռան վերջին օրը երեւանյան ձայնագրման ստուդիաներից մեկում հանդիպեցի Գոռին ու "Դորիանս” խմբի պրոդյուսեր Վահագնին: Նրանք արդեն գիտեն, թե ինչպիսի տեսք է ունենալու առաջին ալբոմը ու էլի լիքը-լիքը մանրամասներ ձայնասկավառակի հետ կապված, բայց այդ ամենը գաղտնիության յոթ կնիքների տակ է պահվում:): Մի գաղտնիք, այնուամենայնիվ, ինձ հաջողվեց բացահայտել. ձայնասկավառակը կոչվելու է "Fly”` համանուն երգի անունով:
 "Դորիանսը” շուտով կնշի իր գործունեության երեք տարին
"Մենք պարտք ենք էդ երգին: Իրենով դարձանք "Դորիանս” ու սիրվեցինք: Այնպես որ, մեր տուրքն ենք մատուցում այդ երգին”,- պատմում է Վահագնը:
"Կու լամ”, "Fly”, "You and Me”, "Life is Really Beautiful”, "Brave” հիթերով ձայնասկավառակում տեղ է գտել 10 երգ: Դրանք հասցրել են սիրվել ու հայտնի դառնալ: Ամենից շատ վերաձայնագրված երգը "Life is Really Beautiful”-ն է, գրեթե ոչ մի փոփոխության չի ենթարկվել "Կու լամ”-ը:
Ձայնագրման աշխատանքները կավարտվեն ու կմնա ձայնի վերջնական մոնտաժը` մասթերինգը: Ու հենց այս պահին մի շա~տ ուրախալի նորություն. "Դորիանս” խմբի պաշտոնական հովանավոր "Երեւան փրոդաքշն” ընկերության շնորհիվ մարտի 15-ին "Fly”-ը "կթռնի” Բելգիայի մայրաքաղաք Բրյուսել` ենթարկվելու վերջնական մասթերինգի:):
 "Դորիանս” խմբի վոկալիստ Գոռ Սուջյանը
"Մասթերինգը աշխատանքի 70 տոկոսն է, ձայնագրությունը`30: Բրյուսելի լավագույն ձայնագրման ստուդիաներից մեկում կկատարենք վերջնական աշխատանքները: Հայաստանում ձայնասկավառակի վաճառքը արդեն բիզնես չի, բայց, եթե դու լուրջ երաժիշտ ես, ուրեմն պիտի ունենաս լուրջ ձայնասկավառակ` լուրջ սաունդով”,- պատմում է Վահագնը:
"Մարդու անձնագրում միշտ մնում ա իր ստորագրությունն ու նկարը: Մեր ձայնասկավառակը մեր անձնագիրն ա, դրանով ենք մենք ներկայանալու”,- հավելում է Գոռը:
Բրյուսել կմեկնեն վոկալիստ Գոռը, հարվածային գործիքներ նվագող Արմանը եւ խմբի պրոդյուսեր Վահագնը: Ի դեպ, Գոռը նշում է, որ ճանապարհորդությունները լավ են անդրադառնում խմբի կազմի ու գործունեության վրա. "Մենք ընտանիք ենք, ու խմբի ընտանիքը ավելի է ամրապնդվում ճանապարհին: Կարող ենք դուրսը ինչ-որ բան տեսնել, երկար քննարկել, ընդհանուր հայտարարի գալ ու դա կարող ա, օրինակ, մի գույն լինի”, -պատմում է Գոռը:
 Այժմ տղաները շարունակում են ձայնագրման բուռն աշխատանքները
Ի դեպ, ցանկանո՟ւմ եք իմանալ, թե ինչպիսին են տղաները ճանապարհին: Լսեք` ինչ է պատմում Գոռը :). "Դաշնակահար Արմանը մեր շուխուրն ա, հարվածային գործիքներ նվագող Մանչը մեր լռությունն ա, բաս-կիթառահար Էդոն դինջն ա, կիթառահար Գագոն խոսացողն ա, Վահագնը ձյաձյան ա, էլ ո՟վ կար:)”:
"Իսկ Գոռին համակարգիչն է անհրաժեշտ, որ հանգստանա”,- ավելացնում է Վահագնը:):
Առաջին ձայնասկավառակը դեռեւս թողարկված չէ, բայց "Դորիանսը” շատ երգեր ունի գրված արդեն հաջորդի համար:
|
