Ինչու են մարդիկ սոցցանցերում հեշվետվություն տալիս իրենց ամեն քայլի, հոգեվիճակի, տրամադրության մասին: Պատճառն այն է, որ ժամանակակից մարդը միայնակ է: Հաճախ նա չունի մեկը, որի հետ կկարողանա կիսվել, հոգին բացել: Հիմա մեծ քաղաքներում մի տանիքի տակ ապրող մարդիկ անգամ հազվադեպ են միասին հավաքվում, չեն ճանաչում իրենց դռնկից հարեւաններին: Փոխարենը, շփվում են վիրտուալ, անկեղծանալով իրենք էլ չգիտեն, թե ում հետ: Այն միտքը, որ զրուցակցիդ իրական կյանքում դժվար թե հանդիպես, ավելի է դրդում անկեղծության: Սիրտդ թեթեւանում է, իսկ պատահական զրուցակիցդ անցնում - գնում է , հավանաբար մոռանալով պատմածներդ: Սակայն ինչ իմանաս, ինչ մարդկային տեսակ է թաքնված համակրելի լուսանկարի եւ սովորական անուն ազգանունի տակ, եւ ինչ հնարավոր խնդիրների առաջ կկանգնեցնի այդ վիրտուալ սրտաբացությունը: Ուստի հոգեբանները խորհուրդ են տալիս սոցկայքերում պահել այնպես, ինչպես փողոցում: Բրիտանացիները մի տեսահոլովակ էին տարածել, որտեղ մեկը վազում էր փողոցով եւ ամեն պատահածի խնդրում ընկերանալ իր հետ ու շփվել: Նրան բոլորը խելագար համարեցին, այնինչ նա բնութագրում էր սոցցանցի օգտատերի: |
