Ինտերնետում տեղադրված տեսանյութը, որտեղ երկու դեռահաս աղջիկներ, ովքեր անպատվում են իրար ամենալկտի հայհոյանքներով, իսկ նրանց կողքին գտնվող տղաները որոնցից շատերի հասակը դեռ կարճ է աղջիկներից, կողքից հրճվում են, նկարահանվել է 2011 թվականի ապրիլին, իսկ տեսանյութի «հերոսուհիները» Երեւանի քաղաքապետարանի ենթակայության թիվ 102 դպրոցի սաներ են։ Այդ մասին ասաց Կրթության եւ գիտության նախարարության հանրակրթության վարչության պետ Նարինե Հովհաննիսյանը:

«Այս պահին երեխաները հարցաքննվում են ոստիկանությունում, ոստիկանություն են հրավիրվել եւ դասղեկը եւ երեխաների ծնողները»,- տեղեկացրեց Հովհաննիսյանը, նշելով, որ աղջիկներից մեկն արդեն ավարտել է դպրոցը:

Նրա  խոսքով` թեեւ տեսանյութը մեկ տարվա վաղեմության է, սակայն դա որեւէ նշանակություն չունի: Դպրոցի տնօրենը  հրավիրվելու է ինչպես Երեւանի քաղաքապետարանի կրթության վարչություն, այնպես էլ Կրթության նախարարություն, որպեսզի հստակեցվի, թե ով է այս ամենի մեղավորը, որպեսզի այսպիսի դեպքերը կանխվեն:

Հարցին, թե եթե պարզվի, որ միջադեպը եղել է դասերի ժամին, ապա ի՞նչ է սպասվում ուսուցչին, Հովհաննիսյանը պատասխանեց. «Եթե դա տեղի է ունեցել դասի ժամին, ապա ինչ-որ մարդիկ պետք է պատասխան տան: Տնօրենն այդ պահին նոր էր ստանձնել պարտավորությունը»: