Այն պահին, երբ Ստամբուլում բարձրացվել էր Հայաստանի Հանրապետության դրոշը, հնչում էր Հայաստանի Հանրապետության հիմնը և մեդալներ էին հանձնում մեր շախմատիստներին, նույն Հայաստանի Հանրապետության Հանրային հեռուստաընկերության եթերում «Այսօր դու կմեռնես» մարտաֆիլմն էր՝ Ստիվեն Սիգլի մասնակցությամբ։ Ինձ շատ հետաքրքիր է մի բան. ինչու՞ է Հայաստանի Հանրապետությունը ընդհանրապես պահում Հ1-ը և ինչու՞ է ֆինանսավորո ւմ պետբյուջեից։ Չէ՞ որ այդ պետբյուջեն մենք ենք լցնում, մեկը՝ ես, մյուսը՝ ձեզանից յուրաքանչյուրը, մեր լրատվամիջոցը, այլ լրատվամիջոցներ։ Մենք աշխատում ենք և մեր աշխատած գումարներից հարկեր ենք վճարում, մեր վճարած հարկերով հավաքվում է բյուջեն։ Եվ ինչու՞ պետք է իմ վճարած հարկից հավաքված բյուջեից գումար հատկացվի մի հեռուստաընկերության, որը այս պատասխանատու պահին Ստիվեն Սիգլի մարտաֆիլմն է ցուցադրում։ Ախր Ստամբուլում ամեն օր չեն Հայաստանի հիմն հնչեցնում, սա մի չտեսնված ու չլսված երևույթ է, մի մեծ հաղթանակ է՝ մեր դրոշը բարձրացավ Թուրքիայում։ Իսկ Հ1-ով Ստիվեն Սիգլն է...
Չէի անդրադառնա այս հարցին, եթե սա միակ բացթողումը լիներ։ Բայց, ավաղ, միակը չէ. մեր ֆուտբոլի հավաքականի հաջողությունները, օրինակ, դիտում ենք «Արմենիա» հեռուստաընկերությամբ և այլն, և այլն։ Չեմ ուզում երկար թվել ժամանակի սղության պատճառով, կարծում եմ, ինքներդ էլ գիտեք, վերջիվերջո հեռուստացույց նայում եք։
Հիմա թող ամեն մեկը իրեն հարց տա՝ պե՞տք է արդյոք մեզ նման Հանրային հեռուստաընկերություն և արդյո՞ք Հ1-ը հանրային է ու որևէ կապ ունի Հայաստանի հանրության հետ։ Չէ՞ որ մեզ համար չի կարող մեկ լինել, թե ինչի վրա են ծախսվում մեր քրտինքով աշխատած փողերը։ Կարեն Վարդանյան |
