Լոնդոնի ամառային Օլիմպիական խաղերում այսօր ասպարեզ դուրս կգա 69կգ քաշային Մելինե Դալուզյանը: Ծանրամարտի Եվրոպայի կրկնակի չեմպիոնը կփորձի առաջին մեդալը բերել Հայաստանին: Այս քաշային կարգում մեդալի հավակնորդները բավական շատ են, ու սպասվում է թեժ մրցակցություն: Եվ դա այն դեպքում, երբ Ռուսաստանի ներկայացուցիչ Օկսանա Սլիվենկոն վնասվածքի պատճառով չի մասնակցում խաղերին: Իսկ Սլիվենկոն այս քաշային կարգի ընդգծված ֆավորիտն էր: Մելինե Դալուզյանը աշխարհի 2012թ. առաջնությունը ձախողեց` ստանալով 0, սակայն գյումրեցի մարզուհին բազմիցս ապացուցել է, որ ի զորու է հասնել մեծ հաջողությունների: Այժմ ծանոթանանք Մելինե Դալուզյանի հիմնական մրցակիցներին. Շիհ-Սու Հուանգ (Տայպեյ) 37-ամյա այս մարզուհին բավական մեծ փորձ ունի ծանրամարտում, ու սա նրա` օլիմպիական մեդալ նվաճելու վերջին հնարավորությունն է: Հուանգը հաջող է հանդես եկել Ասիայի այս տարվա առաջնությունում, իսկ աշխարհի 2012թ. առաջնությունում 4-րդն էր: Դանիելա Կոկոս (Ռումինիա) Ռումինիայի միակ ներկայացուցիչն է կանանց ծանրամարտում: 23-ամյա մարզուհին վերջին 3 տարիներին աչքի է ընկնում կայուն արդյունքներով: 63կգ քաշային կարգում ունեցած հաջողություններից հետո այս տարի տեղափոխվել է 69կգ: Եվրոպայի այս տարվա առաջնությունում 2-րդն էր: Աննա Նուրմուխամբետովա (Ղազախստան) 19-ամյա Նուրմուխամբետովան ավելի անփորձ մարզուհի է: Խոշոր մրցաշարերում առայժմ մեդալ չի նվաճել: Աշխարհի 2011թ. առաջնությունում հանդես է եկել 75կգ քաշայինների պայքարում ու գրավել է 7-րդ տեղը: Ուբալդինա Վալոյես (Կոլումբիա) Բավական փորձառու մարզուհի է, ով արդեն 3-րդ անգամ է հանդես գալու Օլիմպիական խաղերում: Ելույթ է ունեցել մի շարք քաշային կարգերում, իսկ այս տարի որոշել է ուժերը փորձել 69կգ քաշայինների պայքարում: |