Երեկ Լա Մասիայի ևս 1 սան նշեց իր նորամուտն առաջին թիմում: Խոսքը Ժերարդ Դեուլոֆեուի մասին է: Իսկ Իսաակ Կուենկան մասնակցեց ողջ խաղին, դարձավ գոլի հեղինակ և լավագույններից էր խաղադաշտում:

Բացի Մեսսիից, ով իր հերթական հեթ - տրիկը ձևակերպեց և Լա Լիգայում խփած գոլերի քանակը հասցրեց 13 - ի, երեկվա խաղում առանձնացան նաև Կուենկան ու Դեուլոֆեուն: Առաջին դարձավ գոլի հեղինակ, իսկ 2 - րդը նշեց իր նորամուտն առաջին թիմում:

2 խաղն անընդմեջ Կուենկան մեկնարկային կազմում էր: Կամպ Նոուն նման բանի առաջին անգամ ականատես եղավ, քանզի Չեմպիոնների լիգայում Պլզենի դեմ Իսաակը դուրս եկավ փոխարինման, իսկ նախորդ խաղը մրցակցի դաշտում էր:

Շրջանցեց փորձարու Ավատին

Կուենկան, ով 2 - րդ անընդմեջ խաղին մասնակցեց ամբողջությամբ, 49 - րդ րոպեին փայլուն փոխանցում ստացավ Ադրիանոյից` դուրս գալով մեն - մենակ: Թվում էր, թե 20 - ամյա հարձակվողը չի դիմանա Մալյորկայի բազմափորձ դարպասապահ Ավատի և մարզադաշտի մոտ 100000 - ոց ճմշմանը: Բայց դա միայն թվում էր, քանի որ Բարսելոնա Բ - ի հարձակվողը շատ հանգիստ շրջանցեց դարպասապահին ու գնդակը սարնասրտորեն ուղղարկեց մրցակցի դարպասը: Խաղից հետո Պեպն այդ դրվագի և Կուենկայի խաղի մասին ասաց. "Իսաակը շատ լավ խաղաց: Դարպասի դիմաց նա գիտի, թե երբ պետք է առաջ ընթանա և թե երբ է հարկավոր փոխանցում կատարել: Մենք շատ գոհ ենք, որ նա գոլի հեղինակ դարձավ":

Դեուլոֆեու` նորամուտ 5 ամիս ուշացումով

Լա Մասիայի տոնը չավարտվեց Կուենկայով: Իսաակի գոլից մի քանի րոպե անց` հանդիպման 63 - րդ րոպեին, Վիլյայի փոխարեն խաղադաշտ դուրս եկավ Ժերարդ Դեուլոֆեուն: Հանգամանքների բերումով, Դեուլոֆեուն իր նորամուտն առաջին թիմում նշեց այն ժամանակ, երբ լրանում էր Ինիեստայի նորամուտի 9 - րդ տարին: 2002 թվականի հոկտեմբերի 29 - ին Բարսայի այժմյան 8 համարը նշեց իր նորամուտն առաջին թիմում` փոխարինման դուրս գալով Չեմպիոնների լիգայի Բրյուգեի դեմ խաղում:

Իրականում Ժերարդն իր նորամուտն առաջին թիմում պետք է նշեր դեռ նախորդ մրցաշրջանում` Ռեալ Սոսյեդադի դեմ խաղում: Մրցաշրջանի վերջում, երբ ամեն բան վճռված էր, Պեպի թիմը Անոետայում պարտվեց Սոսյեդադին 2 - 1 հաշվով: Դեուլոֆեուն պատրաստվում էր մտնել խաղադաշտ, սակայն Միլիտոն վնասվածք ստացավ և Գվարդիոլան ստիպված էր պաշտպան դուրս բերել մարզադաշտ: Ամեն դեպքում Դեուլոֆեուն պաշտոնական խաղում խաղադաշտ դուրս եկավ առաջին թիմի կազմում և դարձավ Պեպի օրոք իր նորամուտն առաջին թիմում նշած 19 - րդ ակումբի սանը:

Նախորդ մրցաշրջանում Դեուլոֆեուն խաղում էր միայն Խուվենիլ Ա - ում: Վերջինս երեկ խաղաց Սարագոսայի իրենց հասակակից թիմի դեմ մրցակցի դաշտում և հաղթեց 1 - 3 հաշվով: Երբ Խուվենիլ Ա - ի խաղացողներն ավտոբուսով վերադառնալիս են եղել Բարսելոնա, տեղեկացել են, որ իրենց նախկին խաղընկերն արդեն նշել է նորամուտն առաջին թիմում: