Ամերիկյան ռեժիսոր, սցենարիստ եւ պրոդյուսեր Դարեն Արոնոֆսկին իր բիբլիական «Նոյ» ֆիլմի նոր լուսանկարներ է հրապարակել: Դրանցում նախագծի գլխավոր հերոսներն են՝ Ռասել Քրոուի, Էմմա Ուոթսոնի եւ այլոց կատարմամբ:
Ժապավենը պատմում է տապան կառուցած Նոյի աստվածային առաքելության մասին: Ֆիլմը մեծ էկրան դուրս կգա 2014 թվականի մարտի 28-ին:
Ըստ Entertainment.ie կայքի, վերջին հարցազրույցներից մեկում Քրոուն նշել է, որ իր կերպարը հանդիսատեսի համար անսպասելի է լինելու: «Հետաքրքիր է, որ մարդիկ Նոյին բարի են համարում, քանի որ նա խնամում էր կենդանիներին»,-ասել է Ռասելը եւ հավելել. «Ծիծաղո՞ւմ եք, ինչ է: Չէ՞ որ նա մեկն է, ով կանգնած դիտում էր, թե ինչպես է զոհվում մոլորակի բնակչությունը»:
«Նա բարի չէ: Նա նույնիսկ սիրալիր չէ: Ինչ-որ պահի որդին նրան ասում է. «Ես կարծում էի՝ քեզ ընտրել են, որովհետեւ դու լավն ես»: Իսկ նա պատասխանում է. «Ինձ ընտրել են, որովհետեւ ես կարող եմ կատարել այդ գործը, տղա»,- մանրամասնել է Քրոուն: