ՀՀ-ում կա 350 000 ոչ Առաքելական եկեղեցու հետևորդ, իսկ քայքայիչ աղանդների հետևորդների թվաքանակը 200 000 է։ Այս մասին այսօր լրագրողների հետ հանդիպմանն ասաց «Քայքայիչ աղանդներից տուժածների օգնության և վերականգնողության կենտրոնի» տնօրեն Ալեքսանդր Ամարյանը:
«Այսօր ՀՀ պետռեգիստրում գրանցված է 67 կրոնական կառույց: Դրանցից 10-ը մեր Առաքելական եկեղեցու կառույցներն են, իսկ մնացածը համարվում են աղանդավորական: Վտանգավոր են քայքայիչ աղանդները: Նրանք պետություն են պետության մեջ, տիրապետում են մեծ գումարների, որոնք ստանում են դրսից, և չի ստացվում վերահսկել, թե ինչ նպատակների են ծառայելու այդ գումարները»,- ասաց Ալեքսանդր Ամարյանը:
Ալեքսանդր Ամարյանն ասաց, որ աղանդների դեմ իրենց պայքարը երբեք չեն դադարեցնելու: Նրա համոզմամբ, այդ աղանդներից շատերի հետևորդներն, ի վերջո, հայտնվում են հոգեբուժարաններում կամ շատ ավելի ողբերգական ավարտ են ունենում: «Բոլորս էլ հիշում ենք մի քանի տարի առաջ Շենգավիթում երբ սատանիստները մի ոսկերչի դաժանաբար սպանել էին, հետո հրկիզել: Նրանց այդ արարքը արարողակարգի մաս էր»,- պատմեց Ամարյանը:
Բացի այդ, նա համոզմունք հայտնեց, որ աղանդների ղեկավարներն, օգտագործելով իրենց միջոցները, նույնիսկ կարող են մտնել քաղաքականության մեջ: «Կարծում եմ, «Սիվիլիթասի» երկու մլն գումարը փոխանցվել է մորմոնների կողմից և չէր բացառվում` հետագա ընտրությունների ժամանակ այդ գումարը ծառայեր ինչ-որ թեկնածուի հովանավորելու համար»,- ասաց Ամարյանը:
Բանախոսը հորդորում է երկրի ղեկավարությանը կրոնական կառույցների մասին նոր օրենք գրել, քանի որ մեր երկրում ցանկացած կրոնական կառույց ազատորեն գրանցվում է Պետռեգիստրում: «Երիտասարդությունը ոտքի է կանգնել ի պաշտպանություն իր հավատքի: Մեր հասարակության պահանջը պետք է լինի այն, որ օրենքը հստակեցվի, կառույցների գործունեությունը սահմանափակվի: Ցանկացած կրոնական կառույց պետք լինի պետության կողմից վերահսկելի»,- ասաց Ամարյանը: Այն հարցին, թե ճշմարի՞տ են այն տեղեկությունները, որ հայ հասարակությունում հայտնի շատ մարդիկ «Կյանքի խոսք» աղանդի հետևորդներ են, Ամարյանը պատասխանեց. «Այսօրվա դրությամբ «Խարիզմատիկ եկեղեցի» կոչվող աղանդավորական շարժման մեջ ներգրավված են թե պետական մարմնի, թե ուժային կառույցների, թե շոու բիզնեսի, և թե բժշկության և այլ ոլորտների ներկայացուցիչներ: Բայց կոնկրետ անուններ չեմ տա»: |