Հայաստանում Facebook-ից օգտվում է 372 հազար 540 մարդ, այդ թիվը վերջին 6 ամիսների ընթացքում աճել է 67 հազար 920-ով:
Երկրի բնակչության թվաքանակով` Facebook-ի ներթափանցումը Հայաստան 12.55 տոկոս է, իսկ ինտերնետ ունեցողների համեմատությամբ` 27,38 տոկոս:
Նմանատիպ երկրների համեմատությամբ` Հայաստանում Facebook-ի օգտագործումը 0.46%-ով ավելի է, քան Լիբիայում եւ 0.57% ցածր, քան Մարշալյան կղզիներում: Այս մասին գրում է Skandalist բլոգը` հղում տալով socialbakers.com կայքին:
Հայկական Facebook-ի ժողովրդագրական պատկերը ցույց է տալիս, որ սոցցանցից օգտվողների ամենամեծ տարիքային խումբը շարունակում են կազմել 18-24 տարեկան անձինք` 132 հազար 820 օգտատեր (36 տոկոս), որին հետեւում է 25-34 տարիքային խումբը` 29 տոկոս: 15-44 տարեկան օգտատերերը կազմում են 11 տոկոս, 6-17 տարեկանները` 9 տոկոս, 13-15 տարեկան` 7 տոկոս, 45-54 տարեկան` 5 տոկոս, 55-64 տոկոս` 2 տոկոս, 65-100 տարեկան` 1 տոկոս:
Ըստ ներկայացրած վիճակագրության` Հայաստանում սոցցանցից օգտվողների 48 տոկոսը տղամարդիկ են, 52 տոկոսը` կանայք: Իսկ, օրինակ, Աֆղանստանում սեռերի միջեւ հարաբերակցությունը այս հարցում 84 եւ 16 տոկոս է, Մավրիկիոսում 55 եւ 45 տոկոս է:
Նշենք, որ Facebook-ի օգտատերերի թիվը դեռեւս 2012թ հոկտեմբերին գերազանցել է 1 միլիարդը: Ամենամեծ օգտատերերի բանակը Ասիայում է, այնուհետեւ` Եվրոպայում, Հյուսիսային Ամերիկայում, Հարավային Ամերիկայում եւ սրանց համեմատությամբ զգալիորեն քիչ` Աֆրիկայում եւ Ավստրալիայում: Ըստ երկրների վիճակագրության` բնակչության թվաքանակի սկզբունքով` Facebook-ից ամենաշատը օգտվում են ԱՄՆ-ում` բնակչության ավելի քան 54 տոկոսը, ապա Բրազիլիայում` 32 տոկոս, իսկ հետո Հնդկաստանում, Ինդոնեզիայում եւ Մեքսիկայում: 200 երկրների տվյալները ներկայացնող այս աղյուսակում Հայաստանը 112-րդ հորիզոնականից հայտնվել է 113-րդում: Մեր երկրում Facebook սոցիալական ցանցից օգտվում է բնակչության 12.55 տոկոսը: Ինչ վերաբերում է քաղաքների վիճակագրությանը, ապա հայաստանյան որեւէ քաղաք ընդգրկված չէր այս ցանկում, փոխարենը առաջին հնգյակը ուներ այսպիսի պատկեր` Բանգկոկ, Ջակարտա. Սան Պաուլո, Ստամբուլ, Մեխիկո:
Աղբյուրը՝ http://asekose.am