Հայաստանի ազգային հավաքականի եւ Դոնեցկի Շախտյորի 22-ամյա կիսապաշտպան Հենրիխ Մխիթարյանն արդեն երկրորդ անգամ ճանաչվեց Հայաստանի լավագույն ֆուտբոլիստ: Հայաստանի ֆուտբոլի ֆեդերացիայի հարցման արդյունքում` Մխիթարյանը ստացավ 284 միավոր: Նա առաջ անցավ ազգային հավաքականի ռմբարկու Յուրա Մովսիսյանին (226) եւ Ռոման Բերեզովսկուն (71): : - Հենրիխ ինչպե՞ս դասավորվեց տարին Շախտյորում: - Մրցաշրջանն Ուկրաինայում դեռ չի ավարտվել, բայց նախորդ մրցաշրջանի համեմատ մեր թիմը մի փոքր զիջում է սեփական ցուցանիշին, թեեւ Ուկրաինայի առաջնությունում Կիեւի Դինամոյին զիջում ենք միայն մեկ միավոր եւ մինչեւ վերջ կպայքարենք չեմպիոնական տիտղոսի համար: Իսկ Չեմպիոնների լիգայում մենք ինքներս մեզ ստեղծեցինք խնդիրներ եւ չկարողացանք կրկնել անցած տարվա հաջողությունը: Բայց սա ֆուտբոլ է եւ առանց պարտությունների չի լինում: Կձգտնենք հաջորդ մրցաշրջանում հասնել նոր հաջողությունների: - Ի՞նչ կասես Հայաստանի ազգային հավաքականի ելույթների մասին: - Բազմաթիվ մարդիկ գոհ են Հայաստանի հավաքականից խաղից: Թիմի խաղացողները նույն կարծիքին են: Հավաքականը մեծ աշխատանք կատարեց եւ ակնհայտ է առաջընթացը թիմի խաղում: Բայց ես կարծում եմ, որ մենք ի վիճակի էինք ավելին անել: Թիմը երիտասարդ է եւ կարող է ապագայում ավելի բարձր արդյունքի հասնել: Յուրաքանչյուր խաղում ֆուտբոլիստները ձեռք են բերում նոր փորձառություն, որն առաջիկա հանդիպումներում մեզ շատ անհրաժեշտ կլինի: Մյուս կողմից էլ` հավաքականը չկարողացավ լուծել խնդիրը եւ դուրս գալ Եվրո-2012-ի եզրափակիչ փուլ: Կարող էինք գրավել երկրորդ տեղը: Բայց պետք չէ ամեն ինչ բարդել Իռլանդիա - Հայաստան հանդիպման մրցավարի սխալների վրա: Մրցավարը յուրաքանչյուրի նման կարող է սխալվել: Սխալը ճակատագրական էր, բայց այժմ պետք է մտածել 2014թ. աշխարհի առաջնության ընտրական մրցաշարի մասին: - Ի՞նչ հնարավորություններ ունի Հայաստանի հավաքականը Իտալիայի, Դանիայի, Չեխիայի, Բուլղարիայի եւ Մալթայի թիմերի հետ պայքարում: - Կան մարդիկ, որոնք վիճակահանությունից անմիջապես հետո սկսում են միավորներ հաշվել: Չեմ կարծում, թե դա ճիշտ մոտեցում է: Մենք ամբողջ թիմով վստահ ենք, որ յուրաքանչյուր հանդիպման պետք է դուրս գալ ամբողջ էներգիայով եւ խաղադաշտում թողնել բոլոր ուժերը: Անկախ մրցակցից, մենք ձգտելու ենք առավելագույն արդյունքի եւ ամեն խաղում դրսեւորելու ենք մեր հնարավորությունների առավելագույնը: Իսկ այս ամենին հնարավոր է միայն անմնացորդ նվիրումով խաղալով: - Հենրիխ դու ճանաչվեցիր Հայաստանի լավագույն ֆուտբոլիս: Ի՞նչ զգացումներ ունես: - Ես շատ ուրախ եմ եւ շնորհակալ եմ իմ օգտին քվեարկած մարդկանց: Տիտղոսը պարտավորեցնում է ավելի լավ խաղալ: Բայց ասեմ, որ սա միայն իմ հաղթանակը չէ: Ես կարծում եմ, որ լավագույնը թիմն էր: Առանց իմ խաղընկերների ես չէի կարողանա հասնել հաջողությունների: Այնպես որ կիսում եմ այս հաջողությունն ամբողջ թիմի հետ: Եթե ես քվեարկեի, ապա կնշեի ամբողջ թիմին: - Բոլորին է հայտնի, որ դու Դոնեցկում ապրել ես Մետալուրգի մարզաբազայում, իսկ այժմ էլ բնակվում ես Շախտյորի ակումբային բազայում: Ո՞րն է պատճառը: - Դա իմ որոշումն է: Այսպես ինձ ավելի հարմար է եւ մարզվել, եւ նախապատրաստվել հանդիպումներին: Պետք է միշտ պատրաստ լինել խաղին, իսկ այսպես ես կարող եմ ավելի հստակ կենտրոնանալ առաջիկա հանդիպման վրա: Բացի այդ, մարզաբազայում ես կարող եմ հստակ կազմակերպել իմ հանգիստը: - Հենրիխ, քեզ միշտ հարցնում են ֆուտբոլի մասին, իսկ անձնական կյանքում ի՞նչ հաջողություններ ունես: - Ես կարծում եմ, որ պետք չէ երկրորդ կեսին փնտրել (ծիծաղում է), պետք է պարզապես հանդիպել նրան: Ես առայժմ չեմ հանդիպել իմ երկրորդ կեսին, բայց հուսով եմ, որ դա մի օր տեղի կունենա: Ես չեմ պատրաստվում մենակ ապրել: Ես ունեմ նպատակ` ստեղծել ընտանիք: Այժմ Դոնեցկում իմ ազատ ժամանակն անցկացնում եմ ընկերներիս հետ կամ էլ հանգստանում եմ: - Ազատ ժամանակ գնո՞ւմ ես ֆուտբոլ դիտելու: - Եղել են այդպիսի դեպքեր: Երբ հնարավորություն ունեցել եմ` գնացել եմ Մետալուրգի հանդիպումներին: Այնտեղ խաղում են Հայաստանի հավաքականի ֆուտբոլիստներ: - Ո՞ր քաղաքում կցանկանայիր հանգստանալ: - Այդ քաղաքը Երեւանն է: Միայն այս քաղաքն է ինձ ձգում: - Ի՞նչ է քեզ համար ֆուտբոլը: - Ֆուտբոլը կյանք է: Ես Ֆուտբոլին որպես աշխատանք չեմ վերաբերվում: Ես ապրում եմ ֆուտբոլով եւ չեմ պատկերացնում ինձ առանց այս խաղի: |