Ապրիլի 17-24-ը ֆեյսբուքյան ցանցի ՛՛Տրիվիադոր՛՛ ինտելեկտուալ խաղի 925 հայ մասնակիցները խաղում էին նախադեպը չունեցող ակտիվությամբ ու համախմբվածությամբ: Նպատակը մեկն էր՝ աշխարհի ինտելեկտուալ զանգվածին ցույց տալ, որ հայերը հիշում են 1915թ. Ցեղասպանությունը և պահանջում են ուշադրություն և ճանաչում: Այդ նպատակով այս գաղափարի շուրջ համախմբված բոլոր հայ խաղացողները իրենց կայքէջի գլխավոր նկարները փոխարինել էին Ցեղասպանությունը դատապարտող միևնույն նկարով: Արդյունքն առավել, քան գոհացնող է. շաբաթական կտրվածքով լավագույն 10-յակում տեղ գրավեցին 9 հայ, լավագույն հարյուրյակում` 54 հայ, իսկ Հայաստանը գրավեց առաջին հորիզոնականը՝ հավաքելով ռեկորդային քանակությամբ միավորներ և խաղի քարտեզի վրա առաջին անգամ ՛՛ծածանվեց՛՛ հայկական դրոշը: Սակայն ամենակարևոր հանգամանքը թերևս այն է, որ բազմաթիվ օտարերկրացիներ, որոնք չգիտեին Մեծ Եղեռնի մասին, տեղեկացան հայ խաղացողների բացատրությունների շնորհիվ: Մեր մասնակիցների համախմբվածությունն ու նպատակասլացությունը զարմացրել ու հիացրել է բազմաթիվ օտարերկրացիների, ովքեր շնորհավորել են մեզ՝ հաղթանակի կապակցությամբ ու հայտնել իրենց ցավը Եղեռնի հետ կապված: Անարձագանք չի մնացել նաև հարևան Ադրբեջանը, որի ներկայացուցիչներն այդպես էլ չեն հաշտվում այն մտքի հետ, որ մեր հաղթանակը մեր ազնիվ խաղի ու համախմբվածության արդյունքն է: Շնորհավորում ենք տրիվիադորյան հայ բանակին այս մեծ հաղթանակի կապակցությամբ: Նրանք ևս մեկ անգամ հաստատեցին, որ հայի հաղթանակը իր հավաքական ուժի մեջ է: Շնորհավորում ենք նաև Խորեն Տիգրանյան Վահրամ Փափազան Էմիլ Միրզոյան Կարինա Զիբզիբադզե (ազգությամբ հայ) Հայկ Խեմչյան հերոսներին, ովքեր լավագույն հնգյակում են:
|