Վազգեն Սարգսյանի անվան «Հանրապետական» մարզադաշում 20:00-ին սկսվեց Հայաստան - Ղազախստան ընկերական հանդիպումը: Նախքան խաղը սկսելը՝ մարզադաշտում եղած բոլոր ֆուտբոլասերներն ու հավաքականները մեկ րոպե լռությամբ հարգեցին նախօրեին զոհված 3 հայ զինծառայողների հիշատակը:
 

Առաջին իսկ րոպեներին մեր հավաքականը, հետաքրքիր խաղ ցուցադրելով, կարողացավ դարպասի գրավում արձանագրել, 6-րդ րոպեին Հենրիկ Մխիթարյանի վարպետորեն իրականացված եզրային փոխանցումը եզրափակեց Գևորգ Ղազարյանը` առաջ մղելով Հայաստանի ընտրանուն:
 

Մինչ առաջին խաղակեսի ավարտը Մինասյանը ստիպված եղավ կատարել փոփոխություն: Վնասվածք ստացած Լևոն Հայրապետյանի փոխարեն խաղադաշտ մտցրեց Դավիթ Մանոյանին: Հայրապետյանի փոխարեն պաշտպանության ձախ կողմում սկսեց գործել Արտակ Եդիգարյանը, իսկ Մանոյանը դիրքավորվեց կիսապաշտպանությունում:

Ոգևորված առաջին գոլից՝ հայ ֆուտբոլիստներն ավելի ակտիվ սկսեցին գործել:
 

Առաջին խաղակեսի արդյունքներով երկու գոլի հեղինակ դարձավ Գևորգ Ղազարյանը, և ևս մեկ գոլ խփեց Յուրա Մովսիսյանը:
 

Երկրորդ խաղակեսի մեկնարկին Ռոբերտ Արզումանյանին փոխարինեց Մկոյանը, իսկ Կարլեն Մկրտչյանին՝ Սարկիսովը:
 

Հայաստանի հավաքականը 3:0 հաշվով հաղթեց Ղազախստանի հավաքականին:
 

Շնորհավորում ենք, ու շնորհակալություն ենք հայտնում մեր թիմին լավ խաղի համար:

Նշենք, որ սա Հայաստանի և Ղազախստանի ընտրանիների 5-րդ հանդիպումն էր, և հայ ֆուտբոլիստները իրենց   3-րդ հաղթանակը վաստակեցին: Նախորդ հանդիպումներից մեկն ավարտվել էր ոչ ոքի, մեկ անգամ էլ հաղթել էին ղազախները: