Google ընկերությունն իր օգտատերերին հնարավորություն կտա ոչ միայն վիտուալ տեսնել հեռու քաղաքների փողոցները, այլ նաև «մտնել» խանութներ և այլ հասարակական վայրեր:
Ինչպես հաղորդում է korrespondent.net-ը, նոր տեխնոլոգիան ստեղծվել է «Փողոցների տեսարան» (Street View) ծառայությունների զարգացման համար:
Որոշ երկրներում, մասնավորապես Գերմանիայում, բնակիչները բողոքում են, որ համացանցում փողոցների և տների նկարների տեղադրումը խախտում է իրենց անձնական կյանքի իրավունքը:
Google ընկերության մենեջերի խոսքերով` ցանկացողները կարող են միանալ այս նախագծին: Խանութների և այլ հասարակական վայրերի տնօրենները ուրախ կլինեն լրացուցիչ գովազդի համար:
Փորձնական ծրագիրն ընդգրկում է Լոնդոնը, Փարիզը ԱՄՆ մի քանի քաղաքներ, Ավստրալիան, Նոր Զելանդիան և Ճապոնիան:
Google-ը խանութների, ռեստորանների, հյուրանոցների, ֆիթնես-ակումբների տնօրեններին առաջարկում է իր ընկերություն ուղարկել նկարները:
Նախագծի մեջ դեռ ընդգրկված չեն ցանցային խոշոր կազմակերպությունները, ինչպես նաև բժշկական հաստատությունները և փաստաբանական գրասենյակները:
Աշխատակիցները պետք է տեղեկացված լինեն նկարահանման մասին, Google-ը խոստանում է համացանցում չտեղադրել նկարներ, որտեղ պատահական մարդիկ են հայտնվել:
Ընկերության պայմանների համաձայն` բոլոր նկարները կդառնան իր սեփականությունը և կարող են կիրառվել այլ նպատակների համար: Նկարի նախկին տերերը կարող են պահանջել ջնջել դրանք, բայց Google-ը չի երաշխավորում, որ բոլոր խնդրանքները կկատարվեն:
Հիշեցնենք, որ Google-ը կյանքի է կոչել «Արվեստ» նախագիծը (Google Art Project), որն օգտատերերին թույլ է տալիս վիրտուալ մուտք գործել աշխարհի 17 թանգարաններ: |