Կալիֆորնիայի դատարանը կարող է անօրինական ճանաչել Facebook սոցիալական ցանցի Like ֆունկցիան, որը հնարավորություն է տալիս մարդկանց իրենց ընկերների հետ փոխանակել տեղեկատվությունն այն մասին, թե որ ապրանքներն են իրենք նախընտրում։ Իրավաբանները պնդում են, որ նահանգի օրենսդրությունը մարդկանց իրավունք է տալիս վերահսկել այն, թե ինչպես են իրենց անուններն ու լուսանկարները օգտագործվում առևտրային նպատկներով։ Այսպիսով, ընկերությանը կարող են մեղադրել առևտրի վերաբերյալ Կալիֆորնիայի օրենքը խախտելու մեջ։ Այս մեղադրանքը վերաբերում է Sponsored Stories ֆորմատի գովազդին։ Այն ցույց է տալիս, թե ինչ քանակի և մասնավորապես որ օգտատերերին է «դուր գալիս» ընկերությունը և նրա արտադրանքը։ Գովազդային արշավի արժեքը գնահատվում է cost-per-click համակարգով, այսինքն վճարը գանձվում է գրության տակ սեղմված Like–երի քանակից։ Սոցիալական ցանցի գործառնական տնօրեն Շերիլ Սենդբերգի խոսքով՝ օգտագործողների «հավանելը» ավելացնում է գովազդը դիտել ցանկացողների թիվը երկու իսկ ապրանքի ձեռքբերման շանսը՝ երեք անգամ։ Facebook–ի օգտատերերը միջինում ունեն 130 ընկեր։ «Մեր նպատակն է օգտատերերին դարձնել մեր մարկետոլոգները»,– Bloomberg–ի հաղորդմամբ՝ ասել է Սենդբերգը։ Բայց դատավոր Լյուսի Կոհի կարծիքով՝ «հայցվորները տրամաբանությանը դեմ չեն գնում՝ ասելով, որ այս կամ այն ապրանքին կողմ արտահայտվելու համար գովազդից եկամուտ ստանալու իրավունք ունեն»։ Հատկանշական է, որ մոտ մեկ ամիս առաջ Facebook–ին հաջողվեց հարթեցնել Դաշնային հանձնաժողովի բողոքը՝ համաձայնելով փոխել սոցցանցի գաղտնիության քաղաքականությունը և գերատեսչության կղմից 20 տարվա ընթացքում ստուգումների ենթարկվել։ |