Մայրաքաղաքում շաբաթ օրվանից՝ հուլիսի 20-ից, ավտոբուսների և միկրոավտոբուսների սակագինը կդառնա 150 դրամ, այս մասին այսօր լրագրողների հետ հանդիպմանը հայտարարեց Երևանի քաղաքապետարանի տրանսպորտի վարչության պետ Հենրիխ Նավասարդյանը:

Տրոլեյբուսի ուղեվարձը կթանկանա 50 դրամով՝ հասնելով 100-ի, մետրոյինը՝ կմնա նույնը՝ 100 դրամ:

Հենրիխ Նավասարդյանը նշեց, որ Երևանում սպասարկում իրականացնող երթուղիների սեփականատերերը իրենց հայտերում ներկայացրել են տրանսպորտի բարձրացման 140-200 դրամի սահմաններում տատանվող սակագինը, սակայն Երևանի քաղաքապետարանը սահմանել է մեկ ընդհանրական սակագին՝ 150 դրամ՝ հաշվի առնելով այն հանգամանքը, որ միկրոավտոբուսների ու ավտոբուսների երթուղիները մոտ 40-50 տոկոսով կրկնվում են:

Քաղաքապետարանի պաշտոնյան հայտարարեց, թե մայրաքաղաքում տրանսպորտի թանկացումը պայմանավորված չէ գազի սակագնի բարձրացմամբ, այլ մի շարք գործոններով՝ վառելիքի, ավտոպահեստամասերի, մեքենաների շուկայական գնի բարձրացում և այլն: