Արդեն հայտնի է, որ ոսկե գնդակի համար պայքարող 23 խաղացողների մեջ են ընդգրկվել Բարսելոնայի 8 խաղացողներ, հաղորդում է իսպանական Mundodeportivo - ն:
Ոսկե գնդակի գործող հաղթող Լիոոնել Մեսսիից բացի, 23 լավագույն խաղացողների ցանկում են Բարսայից ընդգրկվել նաև Չավի Էրնանդեսը, Անդրես Ինիեստան, Ֆրանսեսկ Ֆաբրեգաս, Դավիդ Վիլյան, Էրիկ Աբիդալը, Ժերարդ Պիկեն և Դանիել Ալվեսը:
Այդպիսով, լավագույն 50 - յակում կատալոնյան թիմի 10 ներկայացուցիչներից ոսկե գնդակի համար պայքարը թողեցին Կարլես Պույոլն ու Ալեքսիս Սանչեզը: Վերջինիս բացակայությունը լավագույն 23 - ի կազմում մի փոքր զարմանք է առաջացնում, քանզի նա ճանաչվել է Ա Սերիայի նախորդ մրցաշրջանի լավագույն խաղացող և ՈՒդինեզեի հետ նվաճել է Չեմպիոնների լիգայի ընտրական փլեյյ - օֆֆ փուլի ուղեգիր:
Դեկտեմբերի 5 - ին հայտնի կդառնան այն 3 խաղացողների անունները, ովքեր պայքարելու են տարվա կարևորագույն անհատական մրցանակին արժանանալու համար: Հաղթողի անունը կհրապարակվի Ցյուրիխում` հունվարին 9 - ին: Հատկանշական է, որ Բարսան ամենաշատ ներկայացուցիչներն ունի լավագույն 23 խաղացողների ցանկում: Գվարդիոլայի թիմին խաղացողների քանակով հաջորդում է Մադրիդի Ռեալը, որի բոլոր 5 խաղացողները, ովքեր ներկա էին լավագույն 50 - յակում, անցել են հաջորդ փուլ:
Վաղը France Football - ը պաշտոնապես կհրապարակի 23 խաղացողների այդ ցանկը: Բացի այդ, վաղը հայտնի կդառնան նաև այն 10 մարզիչների անունները, ովքեր կշարունակեն պայքարը տարվա լավագույն մարզչի կոչմանն արժանանալու համար: Այժմ միայն ասենք, որ այդ 10 մարզիչների մեջ են Խոսեպ Գվարդիոլան, Ժոզե Մոուրինյոն և Վիսենտե դել Բոսկեն:
