Ես ծնվել եմ նրա համար, որ մոր սրտում կարոտ դառնամ
Եվ սպասվող որդու նման ` հեռուներից վերադառնամ.
Եթե շուրջս խավար լինի՝ մարդկանց համար փայլատակեմ,
Հասակով մեկ փռվեմ գետին` վհատության ճամփան փակեմ...

Այսօր հայ  բանաստեղծ Պարույր Սևակի ծննդյան օրն է:

Բանաստեղծը ծնվել է 1924 թվականի հունվարի 24-ին Արարատի շրջանի Չանախչի (ներկայիս Զանգակատուն) գյուղում։ 
Պարույրը մանկական հասակից շատ էր կարդում, իսկ 11 տարեկանում գրում է իր առաջին բանաստեղծությունը: 
1940 թվականին դպրոցը գերազանց առաջադիմությամբ ավարտելով՝ ընդունվում է Երևանի Պետական Համալսարանի Բանասիրական ֆակուլտետի հայերենի բաժինը։ Հետագայում Սևակը սովորում է նաև Մոսկվայի Մ. Գորկու անվան գրականության ինստիտուտում:

1970-ին բանաստեղծը ստանում է բանասիրական գիտությունների դոկտոր գիտական կոչումը։

1963-ից մինչև 1971 թթ. աշխատում է որպես ավագ գիտաշխատող Հայաստանի Գիտությունների Ազգային Ակադեմիայի Մ. Աբեղյանի անվան գրականության ինստիտուտում, իսկ 1966-ին նշանակվում է Հայաստանի Գրողների Միության վարչության քարտուղարը։

1971 թվականի հունիսի 17-ին ամբողջ հանրապետությունում տարածվում է բանաստեղծ Պարույր Սևակի մահվան գույժը: Ավտովթար Արարատ-Երևան ճանապարհին:

Սևակին թաղում են հայրենի գյուղում, իր տնկած ծառերից մեկի տակ, ինչպես և ցանկացել էր բանաստեղծը:

Կաթողիկոս Վազգեն Առաջինը Սևակի մասին գրել է. «Պարույր Սևակի ծնունդը` մեր կյանքի, մեր մշակույթի, մեր ներկայի ու մեր ապագայի համար եղավ ճշմարտապես մի «Եղիցի լույս» …