Ինչպես ասում են` բնության մեջ վատ եղանակ չկա: Յուրաքանչյուր եղանակ ունի իր հմայքն ու առանձնահատկությունը: Այդպես է նաև գունառատ և ռոմանտիկ աշնան դեպքում: Եվ անձրևը, և քամին ու բազմերանգ տերևները շուք են հաղորդում աշնանը և մի նոր երանգ` մեր կյանքին: Եթե այդ կարծիքին չես, և անձրևներն ու մռայլ եղանակը փչացնում են տրամադրությունդ, տառապելով ես վեր կենում տաքուկ անկողնուց, քեզ թվում է` կյանքը կորցրել է իր գույները, շուրջն ամեն բան գորշ ու մռայլ է դարձել, ուրեմն և արդեն այս տարվանից աշունը դարձրու սիրելի եղանակներիցդ մեկը:Թույլ մի տուր աշնանային ընկճախտին փչացնել օրդ, զինվիր լավատեսությամբ և ապրիր կյանքդ լիարժեք, ինչ եղանակ էլ լինի: Կառավարիր տրամադրությունդ. Ներքին եղանակը` տրամադրությունը, շատ ավելի կարևոր է, քան դրսինը: Այն, ինչ պատուհանից այն կողմ է, թույլ մի տուր գերիշխի քեզ վրա: Ինքդ ստեղծիր քո եղանակը: Լավ եղանակ ստեղծելու և միշտ բարձր տրամադրությամբ լինելու համար մշտապես լսիր տրամադրող երաժշտություն, դիտիր հաճելի ֆիլմեր և շփվիր միայն դրական մարդկանց հետ: Պարտադիր չէ, որ բավարարվես հեռուստատեսությամբ և ռադիոյով մատուցվող երաժշտությամբ, շարունակ դիտես հեռուստանովելներ ու դրանք քննարկես հարևաններիդ հետ: Դուրս արի այդ տաղտկալի շրջապտույտից: Իհարկե լավ ասվածը հարաբերական է. յուրաքանչյուրս մեր չափանիշն ունենք լավ և դրական կոչվածի վերաբերյալ: Այնպես որ, հետևիր քո չափանիշներին: Իսկ թե ինչ են մտածում մյուսները, միայն իրենց գործն է: Հագիր սրտիդ ուզածը. ով է հորինել, որ աշնանը պետք է միայն գորշ գույներ հագնել. չկա նման բան: Թող որ դու միակը լինես, ով աշնանը կհագնի վառ մորեգույն կամ մանուշակագույն, բայց դա կլինի քո և ոչ շրջապատդ ընտրությունը: Սա քեզ հաստատ մեծ բավականություն կպարգևի: Կարևոր չէ` ամեն եղանակին կարողանում ես քեզ թույլ տալ նոր բան գնել, թե ոչ, էական չէ` ինչ ես հագնում, այլ` ինչպես: Աշնանային ընկճախտը շրջանցելու տարբերակներն ու խորհուրդները շատ են, համացանց էլ լի է այդ ամենով: Չեմ ցանկանում հետևել նրանց օրինակին, միայն ցանկանում եմ ասել ապրիր քեզ համար, այդպես շատ ավելի երջանիկ և բավարարված կլիես, չես չարանա ոչ աշնան, ոչ շրջապատիդ և ոչ էլ ողջ աշխարհի դեմ: Բոլոր հաջողակ,կայացած և երջանիկ մարդիկ իրենք են կերտում իրենց կյանքի ուղին, և դրա ճանապարհին եղանակը չէ, որ պետք է խանգարի: Դու ևս կանգնիր ուժեղների կողքին,ինքդ առաջնորդիր քեզ և ոչ թե առաջնորդվիր եղանակով և այլոց տրամադրությամբ: Եվ վերջապես` սիրիր: Պարզապես սովորիր սիրել այն ամենը, ինչ շրջապատում է քեզ, ամեն ինչում փորձիր դրականը տեսնել ու չկենտրոնանալ բացասականի վրա: Եթե սիրած մարդ ունես, ուրեմն փորձիր երջանկանալ հենց միայն նրա գոյությամբ, անկախ նրանից` ըստ օրացույցի աշուն է, թե մեկ այլ եղանակ: Սիրո եղանակն այլ է` այն չորսից զատ: |