Այսօր` հունվարի 6-ին, արտակարգ դեպք է տեղի ունեցել Արագածոտնի մարզում: Ժամը 17:00-ի սահմաններում ՀՀ արտակարգ իրավիճակների նախարարության փրկարար ծառայության օպերատիվ կառավարման կենտրոն ահազանգ է ստացվել, որ Արագածոտնի մարզի Նիգավան գյուղի տներից մեկում երիտասարդ կինը ծննդաբերում է, եւ շտապօգնության բրիգադը ճանապարհի մերկասառույցի եւ անանցանելիության պատճառով չի կարողանում մտնել գյուղ:
Ինչպես Արագածոտնի մարզից հայտնում է ֆոտոլրագրող Գագիկ Շամշյանը, այս պահին Ապարանի հրշեջ փրկարարական ջոկատի աշխատակիցները ամենագնացով կարողացել են մեծ դժվարությամբ անցնել անանցանելի ճանապարհը, ու հիմա հղի վիճակում գտնվող 19-ամյա Գյուլնարա Պետրոսյանին հարազատների հետ գյուղից տեղափոխում են Երեւան-Ապարան մայրուղի, որտեղից էլ շտապօգնության բրիգադը աղջկան կտեղափոխի Ապարանի հիվանդանոց:
Ֆոտոլրագրողը հայտնում է, որ երեխան կնոջ ընտանիքի առաջնեկն է լինելու:
Քիչ առաջ Գ. Շամշյանը հայտնեց, որ այս պահին ամենագնացը թաղվել է ձյան մեջ եւ չի կարողանում առաջ շարժվել, իսկ հրշեջ փրկարարները հղի կնոջը շուրջ 2 կմ կտեղափոխեն պատգարակով:
Քիչ առաջ ֆոտոլրագրողը հայտնեց, որ Գյուլնարա Պետրոսյանին փրկարարները եւ Ապարանի հիվանդանոցի շտապօգնության բրիգադը հարազատների հետ «Ուրալ» մակնիշի բեռնատար ավտոմեքենայով տեղափոխեցին Ապարանի հիվանդանոց: Ֆոտոլրագրողի հետ զրույցում Գյուլնարան ուրախությամբ պատմում էր, որ ապահով հասել է ծնարան եւ սպասում է իր առաջնեկի ծնվելուն: Գյուլնարայի ամուսինը զինվորական է, գտնվում է Քարվաճառում, արդեն տեղյակ է իրավիճակից եւ գալիս է կնոջ մոտ: Ուլտրաձայնային հետազոտությունը («էխո») ցույց է տվել, որ երեխան տղա է ծնվելու. նրան անվանակոչելու են Սամվել:
Գ. Շամշյանը նաեւ հայտնում է, որ Արագածոտնի մարզի «Տառերի պուրակից» մինչ Նիգավան ճանապարհը մաքրված չէ ձյան շերտից, ինչի հետեւանքով դժվարանում է մեքենաների երթեւեկությունը: |
