ՄԻՋԱՎԱՅՐ
Ակումբ հաճախելիս անպայման որոշիր,թե ում հետ ես գնում:Ավելի լավ է ընկերախմբով` երեքից հինգ հոգով: Նախընտրելի է նաև, որ ձեր խմբում լինի գիտակից ու վստահելի մեկը, ում գուցե այնքան էլ չեք սիրում, բայց ով արբած վիճակում ձեզ մենակ չի թողնի և առաջին պատահած տաքսիով տուն կուղեկցի: Հատուկ ակումբասեր աղջիկների համար. Եթե դուք << Մատրիցա >> ֆիլմի << աղջիկը >> չեք, ով զգեստով մենակ կանգնած էր ակումբում և, ինչպես ասում են, << թույն >> տեսք ուներ, ապա ավելի լավ է ակումբ ներկայանալ ընկերոջ ուղեկցությամբ: Հակառակ դեպքում միայնակ անցկացրած ակումբային յուրաքանչյուր երեկո սպառնում է դառնալ վերձինը սեռական ստրկությունից առաջ ( դե, գուցե մի քիչ չափազանցրի, սակայն ընդհանուր առմամբ դրա վերջաբանն այդպիսինն է ): ԽՄԻՉՔ
Անկախ նրանից` հաճախում ես ակումբ, թե ոչ, կարծում եմ` Red Bull էներգետիկ խմիչքին ծանոթ ես, իսկ Red Bull + օղի համադրությանը ծանոթ են բոլոր ակումբասերները: Red Bull-ը օղու հետ մի քանի անգամ ավելի ուժեղ է ազդում. Այնպես որ, եթե նպատակդ երեկոյի կեսից գետնին քարշ գալը չէ, ապա ավելի լավ է ընտրել օղի+բնական հյութ համակցությունը, ինչն ունի առավել մեղմ ազդեցություն: Այս դեպքում գինոցված լինելու զգացում ես ունենում, բայց և հայելու մեջ առավոտյան ծանոթ դեմք տեսնելու հավանականությունն ավելի մեծ է: Լինելով ալկոհոլի փորձառու շահագործ, ով հասցրել է ալկոհոլի միջոցով իրականցնել վնասակար բոլոր փորձարկումները, կարող եմ ասել, որ ավելի լավ է երեկոյի ընթացքում երկու տեսակ խմիչքից ավելին չպատվիրել, իսկ որ էլ ավելի լավ է, հավատարիմ մնալ մեկ տեսակին: Իհարկե, հաջորդ օրը հիշել և ծանոթների մոտ պարծենալ, թե ինչպես ես ստամոքսիդ մեջ համատեղել յոթ տեսակի խմիչք, արժանի է հիացմունքի,բայց տարիներ հետո շարքից դուրս եկած երիկամներն ու լեղապարկը հաստատ դրան արժանի չեն: Այնպես որ, գերադասելի է ակումբային երեկոյի ընթացքում հնարավորինս խելամտորեն խմել, չխարնել այն խմիչքները, որոնք անծանոթ են օրգանիզմիդ: ՀԱԳՈՒՍՏ
Վերջին երկու տարվա ընթացքում շատ քչերը կարողացան գիտակցել, թե ինչպես է պետք ճիշտ հագնվել ակումբ գնալիս: Կա երկու տարբերակ. այնպես, ինչպես հագնվում են Երևանում և այնպես, ինչպես հագնվում են ակումբ գնալիս: Նախ և առաջ` կարևոր է, որ հագուստը հարմար լինի. Դժվար է պարել այն աղջկա հետ, ում փեշերը պարելու ժամանակ զբաղեցնում են պարահրապարակի կեսը: Եվ, ի վերջո, հիշիր` մարզահագուստը ակումբային հագուստ չէ, թեկուզ այն ուղարկել է արտասահմանում բնակվող հարազատներից մեկը և այն ցուցադրելու ցանկությունը շատ մեծ է: Ավելի լավ է հագնվել թեթև ու ազատ, անկաշկանդ, բայց միաժամանակ ակումբային փայլով: ԼՈՒՍԱՆԿԱՐՎԵԼ
Ակումբային յուրաքանչյուր գեղեցիկ երեկո լուսաբանվում է ակումբային լրագրողների և << պապարացցիների >> կողմից, եթե վառ ու աչքի ընկնող կերպար ես, ապա մեծ է հավանականությունը, որ լուսանկարներդ կհայտնվեն այս կամ այն ժամանցային կայքում ու բլոգում: Եթե չես ուզում այդ նկարն ավելի շատ հիշեցնի կոտրված բազկաթոռի,քան մարդու, կանխազգալով նկարչի մոտենալը` ռազմական դիրք ընդունիր` աղջիկների համար<< ա լյա Քիմ Քարդաշյան գլամուր>> առաջ բերած շրթունքներով, տղաների համար` <<գովազդի տղայի >> հաջողակ երիտասարդի տեսքով: Իսկ եթե ինքնուրույն ոտքի վրա կանգնելն արդեն դժվար է, ապա լուսանկարվիր քիչ խմած ծանոթիդ հետ` համոզված լինելով, որ կարող ես վստահորեն հենվել նրա ուսին: ՊԱՐԵԼ
Գաղտնիք չէ, որ << ակումբային հասարակության >> իննսուն տոկոսը պարել չգիտի` չհաշված պարահրապարակում շիզոֆրենիայով կամ մկանային սպազմով տառապող հիշեցնող շարժումները, բայց դա ընդհանրապես կարևոր չէ: Կարևորն այն է, որ այդ երեկո լինես ազատ և կարողանաս լիցքաթափվել: Ամեն դեպքում շատ ակտիվ շարժումներից էլ զգույշ եղիր. Ով գիտի` երաժշտությամբ տարված ում քիթը կարող ես անզգուշորեն կոտրել: Եթե նույնիսկ անկապ շարժումներին էլ չես տիրապետում կամ, ասենք, ամաչում ես, ապա կարող ես մի բաժակ թույլ ալկոհոլային խմիչքով կանգնել մի անկյունում և դեմքիդ արտահայտությամբ ցույց տալ, որ արդեն հոգնել ես ակումբային կյանքից, բայց եկել ես ուղղակի բարեկրթությունից դրդված, քանի որ հրավիրել են: Այն հարցին, թե ինչու չես պարում, երևանյան տարածված պարզ պատասխանը տուր` << մասսան չի դզում…>>:) Ավելի լավ է մտածեն, որ շատ լավ եք պարում, պարզապես չեք ցանկանում ձեր վարպետությամբ ճնշել պարող չիմացողներին: |
