Արագածոտնի մարզի գյուղերի մի քանի տասնյակ բնակիչներ հունիսի 28-ին փակել են Երեւան-Ապարան ճանապարհը՝ պահանջելով չեղյալ համարել էլեկտրաէներգիայի սակագնի բարձրացման որոշումը։
NEWS.am-ի թղթակից բնակիչները հայտնեցին, որ փակել են Շենավան-Հացավան խաչմերուկը եւ թույլ չեն տալիս մեքենաներին անցնել։ «Սա նախազգուշական ակցիա է, եթե մեր պահանջները չկատարվեն, մենք այնպես կփակենք ճանապարհը, որ կաթվածահար կլինի ամբողջ մայրուղին»,-ասացին բնակիչները։
Այս պահին ոստիկանությունը բանակցում է ցուցարարների հետ՝ փորձելով համոզել եւ բացել ճանապարհը։
Նշենք, որ Բաղրամյան պողոտայում արդեն 7 օրն է, շարունակվում է բողոքի ակցիան։
Հիշեցնենք, որ էլեկտրաէներգիայի թանկացման որոշումը չեղյալ հայտարարելու պահանջով Բաղրամյան փողոցում սկսված նստացույցի 6–րդ օրը` հունիսի 27–ին, նախագահ Սերժ Սարգսյանն խորհրդակցություն է անցկացրել հանրապետության տնտեսական քաղաքականության պատասխանատուների հետ, որի ընթացքում հայտարարել է, որ մինչեւ ՀԷՑ–ի կողմից էլեկտրաէներգիայի թանկացման հայտի հիմնավորվածությունը ստուգող` միջազգային աուդիտի եզրակացության կազմումը կառավարությունն իր վրա կվերցնի սակագնի բարձրացման ամբողջ բեռը` վճարելով 6,93 դրամը։
Եթե աուդիտի արդյունքում հաստատվի թանկացման հիմնավորվածությունը, այդ պահից սպառողները կսկսեն վճարել նոր սակագնով, եթե այն անհիմն ճանաչվի, ապա կառավարությունը քայլեր կձեռնարկի Բաշխիչ ցանցերից ավելի վճարված գումարը հետ գանձելու եւ թերացած պաշտոնատար անձանց պատասխանատվության կանչելու համար: Բացասական եզրակացության դեպքում, ըստ նախագահի, հնարավոր է ՀԷՑ սեփականատիրոջ փոփոխություն` չբացառելով նաեւ այն պետությանը վերադարձնելու և մրցակցային կառավարման հանձնելու տարբերակը:
Նշենք, որ հունիսի 23-ի երեկոյան ժամը 19:00-ից քաղաքացիները հավաքվել են Բաղրամյան պողոտայում, փակել այն եւ պահանջում են կասեցնել էլեկտրաէներգիայի սակագնի 6,93 դրամով բարձրացման ՀԾԿՀ-ի հունիսի 17-ին կայացրած որոշումը: |